Uu-tilsynet har avslutta to tilsyn med verksemder i helsesektoren. Både Helse Førde HF og Eyr Medical AS har no retta opp feila som vart avdekka.

Laga: 15. oktober 2025

Begge verksemdene vart kontrollerte som del av årets satsingsområde – digitale løysingar i helsesektoren. Helse Førde vart kontrollert for universell utforming av nettstaden helse-forde.no, medan Eyr Medical AS vart kontrollert for universell utforming av Eyr-appen for iOS.

– Digitaliseringa av helsetenestene går raskt, og då er det avgjerande at ikt-løysingane fungerer for alle, uavhengig av funksjonsevne. At både offentlege og private aktørar følger opp tilsyn og rettar feil, viser at arbeidet vårt har effekt, seier tilsynsdirektør Malin Rygg.

Fem brot hos Helse Førde – godt arbeid med retting

Tilsynet med Helse Førde HF viste at verksemda hadde brot på fem av tretten krav til universell utforming. Feila gjaldt mellom anna mangelfull koding av overskrifter i dokument og manglande tekstalternativ til bilde, som gjer det vanskeleg for ein som navigerer med hjelpemiddelteknologi.

Verksemda fekk pålegg om retting i juni 2025, med frist til 12. september. Oppfølgingstesten viste at det var gjort ein tilstrekkeleg jobb med retting.

– Helse Førde har gjort ein framifrå jobb, både i forkant og etter tilsynet. Dei hadde eit godt utgangspunkt og har følgt opp på ein grundig måte, seier Rygg.

Eyr unngjekk iverksetting av tvangsmulkt etter retting

Kontrollen av Eyr Medical AS retta seg mot Eyr-appen for iOS som har timebestilling som mest brukte oppgåve i appen. Tilsynet avdekte i mai 2025 brot på seks av åtte krav som vart testa. Brota gjaldt mellom anna manglande tekstalternativ til bilde, manglande koding av struktur og presentasjon i innhaldet, låg kontrast og feil i skjema.

Feil i skjema gjer det vanskeleg å bruke appen for alle brukarar, men får særleg konsekvensar for personar som er blinde, har nedsett syn, nedsett motorikk eller nedsett kognisjon. Dei andre feila gjer appen vanskeleg å bruke for blinde og svaksynte.

Etter første oppfølgingstest var mange av feila ikkje retta, og tilsynet fatta vedtak om tvangsmulkt. Verksemda risikerte iverksetting av bot på 15 000 kroner dagen, dersom feila ikkje vart retta innan 6. oktober.

I oppfølginga vart to av funna trekte tilbake som ikkje-brot, på grunn av dokumenterte tekniske avgrensingar i iOS-rammeverket. Uu-tilsynet tek dette inn i vidare rettleiing og eigne rutinar.

Etter ny oppfølgingstest 6. oktober kunne Uu-tilsynet konstatere at Eyr hadde retta brota og no oppfyller dei krava som var testa i tilsynet.

– Vi ser at Eyr tok klare grep etter at dei fekk vedtaket om tvangsmulkt. Dialogen med tilsynet var målretta og konstruktiv. Det viser at reaksjonane våre verkar, og at verksemder kjem i mål når dei prioriterer universell utforming, seier Rygg.

Tilgjengelege helsetenester for alle

Årets sektortilsyn har vist så langt at både offentlege og private aktørar i helsesektoren framleis har utfordringar med universell utforming av digitale løysingar. Samstundes viser sakene at dialog, tilsyn og rettleiing verkar – og at verksemder tek ansvar når dei får påvist feil.

– Vi ser store forskjellar mellom verksemder, men også stor vilje til forbetring. Universell utforming handlar ikkje berre om tekniske krav, men om likeverdig tilgang til helsetenester for alle, avsluttar Rygg.

Pressespørsmål

For meir informasjon eller intervju, ta gjerne kontakt: