Sektortilsyn med digitale løysingar i helsesektoren

Sektortilsynet inneber at verkemiddel som kontrollar, områdeovervaking, kartleggingar og rettleiing vert retta inn mot å betre digital deltaking i helsesektoren i perioden.

Arbeidet er i gang, og startar med innhenting av informasjon, kartlegging og dialog med ulike aktørar. I løpet våren vil vi varsle tilsyn med både private og offentlege verksemder i helsesektoren. Tilsyna blir utført i løpet av året.

Kvifor helsesektoren?

Helsesektoren tilbyr digital informasjon og tenester retta mot innbyggjarar, som er svært viktige for den enkelte. At digital informasjon og tenester gitt via nettstader, appar og automatar er i tråd med regelverket om universell utforming av ikt, er avgjerande for å sikre likeverdig samfunnsdeltaking.

I nasjonal e-helsestrategi frå Helsedirektoratet er mål 1 «Aktiv medvirkning i egen og næres helse.» Målet er sett opp i fem ulike delmål med vegkart. Fleire av delmåla byggjer på at digital informasjon og tenester innan helsesektoren er universelt utforma og brukarvennleg for innbyggjarane.

– For innbyggjarar med nedsett funksjonsevne er universell utforming ofte ein føresetnad for digital inkludering. Innbyggjarar i kontakt med helsevesenet kan vere i ein vanskeleg livssituasjon. Gode, universelt utforma, digitale løysingar kan bidra til at kontakten blir enklare og meir effektiv, seier tilsynsdirektør Malin Rygg.

Kva er sektortilsyn?

Eit sektortilsyn består av kontroll av etterleving, rettleiing, dialog med verksemder, brukarorganisasjonar og leverandørar, myndigheitsorgan på området og andre viktige aktørar.

Vi vil systematisere innspel, gjere kartleggingar, analysere data og gå gjennom forsking. Samla skal desse aktivitetane gi Uu-tilsynet god oversikt over kva som er utfordringane i sektoren knytt til universell utforming og digital inkludering.

Formålet er å bidra til at digitaliseringa av helsesektoren kjem alle innbyggjarar til gode.

Marknadskartlegging

For å få oversikt over marknaden for ikt-løysingar i helsesektoren skal Proba Samfunnsanalyse på vegner av Uu-tilsynet gjennomføre ei marknadskartlegging.

Tilsyn med nettstader og appar

Ramma for tilsyn er nettstader og appar retta mot innbyggjarar. Det omfattar også informasjon og tenester som ligg bak innlogging eller autentisering.

Vil vil ikkje føre tilsyn med nettstader, appar og fagsystem for helsepersonell og tilsette, og informasjonsutveksling mellom ulike verksemder i helsesektoren. Vi ser heller ikkje på velferdsteknologi i denne omgangen.

Sjølvbeteningsautomatar

Vidare er det aktuelt å kartlegge førekomsten og bruken av sjølvbeteningsautomatar i sektoren. Vi kjenner til at ulike automatar retta mot innbyggjarar, er mykje brukt i ulike delar av helsevesenet, for eksempel hjå fastlegen, tannlegen og på sjukehusa.

Pressespørsmål

For meir informasjon eller intervju, ta gjerne kontakt:

• Kommunikasjonsansvarleg i Tilsynet for universell utforming av ikt, Torhild Brudvik, tlf. 482 88 309, e-post: torhild.brudvik@digdir.no
• Tilsynsdirektør Malin Rygg, tlf. 971 97 317, e-post: malin.rygg@digdir.no