Har du ein bra film? Slik kan fleire få glede av den.

I dag er det 1. februar 2024 og startskot for at alle nye videoar skal ha synstolking. Ein video som er publisert etter denne datoen skal følge kravet om synstolking og det vil eg seie litt om i denne bloggen.

Synstolking skal gjere det enklare for ein med nedsett syn å følge med på ein video eller film, og du vil nå fleire med bodskapen din. Ein video er visuell og kan ha ein informativ plakat som ein person som er svaksynt eller blind ikkje får med seg. Kor mykje synstolking som er nødvendig, kjem an på videoen. Det er ikkje nødvendig med synstolking på eit videoopptak av eit kommunestyremøte der ordstyrar er flink til å introdusere neste talar med namn og parti. Då er synstolkinga integrert i møteleiinga. Det er viktig at du som lagar ein video, tenker gjennom om du når alle. Full gjennomgang av korleis dette med synstolking kan løysast, kan du lese om i rettleiinga, der vi har lagt ut løysingsforslag for kvart krav i forskrifta.

Det var eit viktig val av Norge i 2013 å bestemme seg for at universell utforming i form av WCAG-krav skulle vere lovpålagt. Det var eit strategisk val for eit samfunn utan digitale barrierar der alle innbyggarane kan delta på like vilkår. Krava gjeld både offentlege og private verksemder, men synstolking gjeld berre dei offentlege. Frå i fjor vart krava skjerpa for offentleg sektor med webdirektivet, og med det fekk vi også kravet om synstolking. Grunnskule og vidaregåande skular er unntatt, med mindre det er videoopptak knytt til viktige nettbaserte administrative funksjonar. Det vil i all hovudsak seie ikkje-pedagogisk innhald.

Lagar du digitalt innhald, kan du finne nyttig hjelp på tilsynets sider om synstolking og video:

• Les om og lytt til podkasten frå august 2023 om kva synstolking er.
• Les vår rettleiing om korleis følge kravet om synstolking.
• Les tilsynets tolking av lovkravet om synstolking.

Ta gjerne kontakt med Uu-tilsynet dersom du har spørsmål, e-post post@uutilsynet.no.